Bislama - Wanem Yumi Mas Mekem blong God Bambae i Sevem Yumi?

namba 04

	Wanem Yumi Mas Mekem blong God Bambae i Sevem Yumi?

Sipos yu wantem we God bambae i nomo kros long yu,
mo hem bambae i tekemaot olgeta sin blong yu. Wanem yu mas mekem?

Man we i bilif long guid nius blong Jisas mo we i baptaes, God bambae i sevem hem. (Mak 16:16)

Baebol i talem se God i stap sevem yumi long gladhat blong hem (Efesas 2:8-10). God i bin sanem pikinini blong hem we hem i ded long kros, mekem se God i save savem yumi, i save tekemaot ol sin blong yumi. Mo God i givim yumi promes blong laef. Nao laef ya i no save finis, from hem i stap long heven (Jon 3:16 1 Jon 2:1-2).

Nao sakrefaes ya, blong pikinini blong God we i ded long kros, hem i stamba blong gladhat blong God we i holemaot long yumi tede. Yumi mas traehad long obei wanem God i wantem (Mat 7:21-23 Hibrus 5:9 Luk 17:10).

Yu luk long letter blong Pol we i bin raetem long Rom. I gat sikis samting long hem we yumi mas mekem. Plante narafala pasis long Bible tu i stap talem olsem ya, be i gud fastaem we yu luk long wan buk ya nomo. Afta, bambae yumi luk long ol narafala pasis.

1. Harem gudnuis long Jisas (Rom 10:11-17)
2. Bilif long Jisas (Rom 1:16-17, 8:34)
3. Telemaot bilif blong Jisas (Rom 10:8-10)
4. Tanem tingting blong yu (Rom 2:4-5, 6:1-2)
5. Baptaes blong tekemaot sin (Rom 6:3-4)
6. Mekem gud fasin blong laef (Rom 12:1-2,11-12)

Oraet nao yumi luk long sam moa pasis long Baebol we i talem olsem, long saed blong bilif mo tanem tingting, mo baptaes.

(A) Yumi mas bilif long Jisas.

Sapos yumi no gat bilif ya, yumi no save kasem laef blong heven. Be bilif nomo, i no naf. Yumi mas soemaot bilif wetem gudfala wok we God i talem yumi. Sapos yumi no obei, naoia bilif blong yumi i ded, i no save savem yumi (Jon 3:16 Mak 16:16 Hib 11:6 Jemes 2:14-26). Mo tu, yumi mas talemaot bilif blong yumi. Sapos yumi no talemaot we Jisas i Hae God, i Masta blong yumi, hem tu i no talemaot nem blong yumi long heven (Rom 10:9-10 Mat 10:32-33).

(B) Yumi mas tanem tingting from ol sin blong yumi.

God i talem se, "Yufala evriwan i mas tanem tingting blong yufala from ol sin blong yufala". Nao niufala tingting ya, bambae i mekem yumi folem niufala fasin blong laef. Jenis ya, i soemaot bilif blong yumi. Sapos yumi gobak long laef blong wol, we yumi stap mekem sin bakagen, yumi lusum laef blong heven. Be sapos yumi holemtaet long bilif blong Jisas, mo yumi traehad blong obei Jisas, hem i savem yumi, mo hem i forgivim ol sin blong yumi (Ol Wok 17:30-31 Rev 2:10 Hib 6:4-6 2 Pita 2:20-22).

(C) Yumi mas baptaes.

Baptaes tu, hem i samting we yumi nidim, mekem se God i sevem yumi. Taem yumi baptaes, oli berem yumi long wota. Long sem taem ya, oli berem yumi wetem Jisas. Yumi kam long ded blong Jisas. Long baptaes, God i leftemap yumi long niufala laef mo yumi bon bakegen. Long baptaes yumi soemaot bilif blong yumi. Sapos no, yumi no kasem mak we God i hapi long yumi (Ol Wok 2:38 22:16 Rom 6:3-4 Gal 3:26-27 1 Pita 3:21 Mak 16:16).

antap | hompej

Written by Ron Graham in Bislama the national language of Vanuatu. Bislama is one of several creoles spoken in Australia and islands of the Pacific.