namba 11
	Tabu Spirit i stap i stap Givhan long Yumi

Tabu Spirit i wokem long yumi olsem wanen?

Nao God i givim Tabu Spirit ya long yufala (Ol Wok 2:38)

Long gladhat blong God, hem i givim Tabu Spirit long evri man we oli bilif long Jisas Kraes, mo oli tanem tingting long ol sin blong olgeta, mo oli baptaes long nem blong Jisas (Ol Wok 2:38-39). Tabu Spirit ya, i stap givhan long olgeta, blong fofala samting olsem...

1. Blong mekem prea

Sipos yumi stap usum paoa blong yumi nomo, yumi no save wanem fasin i stret blong folem blong prea. Yumi no prea long fasin we God i wantem. Be Tabu Spirit i stap givhan long yumi. Hem i mekem prea blong yumi we i kasem mak, i gudfala prea olgeta. God i no luk long tingting blong yumi nomo, be tu i luk long tingting blong Tabu Spirit ya (Rom 8:26-28 ). Tabu Spirit hem i fren blong yumi, i givim help long yumi taem we yumi no save mekem prea.

2. Blong save toktok long Baebol

Sipos yumi stap usum paoa blong yumi nomo, yumi no save everi samting long Baebol, from Baebol i gat sam samting we i strong tumas blong save (2Pita 3:16). Be Tabu Spirit i stap givhan long yumi, mekem se bambae yumi kam waes moa. God i save openem tingting blong yumi mekem se bambae yumi nomo kam konfuis (Efesas 1:13-18 ).

3. Blong wokem sam gudfala samting

Sipos yumi stap usum paoa blong yumi nomo, bambae yumi no save wokem olgeta gudwok blong God we hem i hapi olgeta long yumi. Yumi mas usum paoa we God i givim yumi. Hemia nao bambae yumi save mekem gudfala wok we i leftemap nem blong God (1Pita 4:10-11).

4. Blong stanap agensem Setan

Sipos yumi stap usum paoa blong yumi nomo, bambae yumi no save stanap agensem Setan. Hem i no man olsem yumi. Hem i olsem enjel we i gat bigfala paoa blong hem. Nao hem i stap lidim plante devel we oli bin joen long hem, mo oli stap folem hem, mo oli stap agensem yumi. Oltaem Setan i faet, God i stap givhan long yumi, mo Setan i no save winim yumi from (1Korin 10:13 Efesas 6:10-13).

Lastok long lesen ya

Lesen ya hem i no stap tok long saed blong merekel, nogat. Merekel hem i wan narafala samting olgeta. God i no bin givim paoa blong merekel long evri man blong hem. Be lesen ya, i stap tok blong paoa blong Tabu Spirit we God i givim evri man blong hem olsem. Lesen ya, i stap tok blong fasin blong laef blong olgeta kristin man.

Oli mas stap prea. Oli mas stap ridim Baebol mo lanem ol samting we Baebol i soemaot long olgeta. Oli mas stap mekem gudfala wok, we oli stap obei God, mo we oli stap givhan long narafala man. Oli mas stap faet agensem Setan mo oli mas stap sakem doti long laef blong olgeta.

Hemia nao. Long fasin ya, Tabu Spirit i stap givhan long evri kristin man sipos man i askem mo man i letem.

God i givim yumi Tabu Spirit blong hem, mekem se yumi kasem laef we i no save finis, mo blad blong Jisas Kraes i oltaem mekem yumi klin blong ol sin blong yumi. Jisas i talem se, "Man we i bilif long mi, hem i olsem tok long Baebol we i talem se, 'Wota we i save givim tru laef bambae i kamaot long hat blong hem, olsem wan bigfala reva we i stap ron'" Nao long tok ya, Jisas i stap tokbaot Tabu Spirit (Jon 7:37-38).

antap | hompej

Written by Ron Graham in Bislama the national language of Vanuatu. Bislama is one of several creoles spoken in Australia and islands of the Pacific.

Copyright (C) Ron Graham 2000